Den 11. juni 1913 er det fullt på publikumsgalleriet i stortingssalen. Stortinget skal no bestemme om alle kvinner skal få stemmerett i Noreg.
Mange hadde kjempa i mange år for at kvinner skulle få stemmerett i Noreg. Dei var nok ekstra spente denne dagen.
Det er Grunnlova som bestemmer kven som har stemmerett i Noreg. Då ho vart skriven i 1814, var det berre nokre få menn som fekk stemmerett.
Om kvinner skulle ha stemmerett, vart nok ikkje eingong diskutert.
Mange år seinare, i 1898, fekk alle menn stemmerett. Framleis var det ingen kvinner som kunne stemme, men no var det mykje diskusjon om dette i Noreg.
På slutten av 1800-talet begynte kvinner å samle seg i foreiningar og lag. Dei hadde diskusjonsklubbar, og det kom også eigne foreiningar som jobba for stemmerett for kvinner.
Når kvinnene samla seg, vart dei sterkare, og dei vart også lagt merke til. Fleire menn støtta dei, og nokre av desse var politikarar på Stortinget.
For at kvinnene skulle få stemmerett, måtte Grunnlova endrast, og det er det berre Stortinget som kan gjere.
Fleire og fleire melde seg inn i foreiningane. Dei samla inn underskrifter for stemmerett for kvinner og sende inn til Stortinget. Stortinget stemte fleire gonger over om kvinnene skulle få stemmerett. Sjølv om forslaga vart stemte ned, var det kvar gong fleire som stemte for enn det hadde vore sist.
Nokre år før 1913 fekk nokre kvinner stemmerett. Felles for desse var at dei hadde eiga inntekt.
Den 11. juni 1913 vart det ingen diskusjon i Stortinget. No var dei einige om at alle kvinner burde få stemmerett.
Grunnlova nådde å bli 99 år før alle kvinner fekk stemmerett i Noreg. Sjølv om dette kan verke lenge, var Noreg eitt av landa som var aller først ute med dette, berre slått av New Zealand, Australia og Finland.
Gå saman i grupper og diskuter: 1. Kva betyr det å ha stemmerett? 2. Kvifor trur du kvinner ikkje hadde stemmerett før? 3. Kva er ei foreining? 4. Kvifor blir ein sterkare av å vere fleire saman?
Nokre kvinner var spesielt synlege og aktive i kampen for stemmerett for kvinner. Vel ei av desse kvinnene og finn ut så mykje de kan om henne. De kan samle funna i ein presentasjon som de viser for resten av klassen, eller de kan skrive ein liten biografi.
