Stortinget 2025-29

Dei raudgrøne partia beheld fleirtalet sitt, og Jonas Gahr Støre held fram som statsminister. Men han må samarbeide på andre måtar enn han gjorde før.

Denne presentasjonen gir ei oversikt over resultatet og vegen vidare:

Valresultatet

Resultatet av stortingsvalet avgjer ikkje berre kor store partia på Stortinget blir dei neste fire åra, men også kven som skal sitje i regjering.

I Noreg blir regjeringa danna av det eller dei partia som har støtte frå flest i Stortinget. Dette blir kalla parlamentarisme.

Av Stortingets 169 representantar, kjem 87 frå partia Arbeidarpartiet, Senterpartiet, SV, Raudt og MDG. Det er dette fleirtalet som gir grunnlag for å kalle valet ein raudgrøn siger.

Dermed ligg alt til rette for at Jonas Gahr Støre beheld jobben som statsminister i fire år til.

Regjering med eller utan fleirtal i Stortinget?

Den viktigaste jobben til regjeringa er å foreslå politikk for Stortinget, og gjennomføre den politikken som Stortinget vedtek. Derfor ligg det enormt mykje makt i å sitje i regjering.

Å sitje i regjering, kan samanliknast med å sitje i førarsetet på ein bil. Det er regjeringspartia som har hendene på rattet, og foten på gassen og bremsen. Men kor mykje omsyn regjeringa treng å ta til dei andre partia, avheng av om det er ei fleirtalsregjering eller mindretalsregjering.

Ei mindretalsregjering består av parti som har mindre enn halvparten av representantane på Stortinget, det vil seie færre enn 85 representantar.

Når ei mindretalsregjering foreslår ei lovendring eller eit statsbudsjett, er den derfor avhengig av støtte frå andre parti for å få forslaget vedteke. Regjeringa er nøydd til å forhandle, og må inngå kompromiss for å få gjennomslag for sine viktigaste saker.

Ei fleirtalsregjering slepp å forhandle med opposisjonen, fordi regjeringspartia har fleirtal i Stortinget.

Til gjengjeld kan parti som samarbeider i regjering, oppleve å vere usamde om kva slags politikk dei skal foreslå. Nokre parti ønskjer til og med heller å sitje i opposisjon, og forhandle med regjeringa frå Stortinget, framfor å sitje i regjering sjølv.

Kva skjer no?

Sjølv om dei er det største partiet i landet, er Arbeidarpartiet langt unna å ha fleirtal i Stortinget åleine. Derfor må Arbeidarpartiet finne nokon å samarbeide med.

Arbeidarpartiet ønskjer å sitje i regjering åleine. Likevel kjem Støre til å snakke med leiarane for dei andre raudgrøne partia for å finne ut kva dei kan bli samde om.