Lær om kommunestyreval

Kva betyr valet for deg?

Går du på skule? Er du hos tannlegen innimellom? Låner du bøker på biblioteket? Har du nokon gong vore hos helsesjukepleiar? Bruker du sykkelvegar eller kollektivtransport? Er du nokon gong i symjehallen?

Svarte du ja på eitt eller fleire av desse spørsmåla? I så fall er valet viktig for deg. Når det er kommunestyre- og fylkestingsval bestemmer vi nemleg kven som skal ha ansvaret for desse tinga der vi bur.

Når og kvar er valet?

Sist val var i september 2023. Neste val er i 2027.

Val går føre seg i alle kommunar og fylke i heile landet. Ofte blir det sett opp vallokale på skular og i rådhus.

Kven kan stemme?

Alle norske statsborgarar over 18 år har stemmerett. Dei som fyller 18 år etter valdagen, kan også stemme.

I kommunestyre- og fylkestingsvalet har også utanlandske statsborgarar over 18 år stemmerett. Dei må ha budd i Noreg i minst tre år.

Kva vel vi?

I dette valet vel vi kven som skal styre i kommunen og fylket der vi bur.

I kommunestyret sit ordføraren og dei andre politikarane som bestemmer i kommunen. Dei har mellom anna ansvaret for skulane, eldreomsorga og biblioteka.

I fylkestinget sit politikarar som bestemmer i fylket. Dei har til dømes ansvaret for vidaregåande skular, mange av vegane og tannhelsetilbodet.

Kva eller kven stemmer vi på?

I valet stemmer vi på parti. Før valet lagar partia listar med folk dei vil skal sitje i kommunestyret eller fylkestinget.

Jo fleire stemmer partiet får, jo fleire folk får dei inn. Desse folka er politikarar.

Viss du bur i Oslo og Bergen, så veit du kanskje at kommunestyret hos deg heiter bystyre? Desse to byane har både ordførar og byrådsleiar.

Kva skjer etter valet?

Allereie dagen etter valet er mykje klart. Då veit vi ofte kven som har fått plass i kommunestyret og fylkestinget. Etter kvart får vi også vite kven som blir ordførar.

Dei som blir valde sit i kommunestyret eller fylkestinget i fire år, så er det val på nytt.