11 spørsmål og svar om stortingsvalet

1. Kva er Stortinget?

Mange tenkjer på stortingsbygningen når dei høyrer ordet «Stortinget». Stortingsbygningen ligg i Karl Johans gate i Oslo.

Dei som jobbar på Stortinget kallar vi stortingsrepresentantar. Dei er 169 og når dei er samla kallar vi også dei for «Stortinget».

Stortinget bestemmer kva lover som skal gjelde i Noreg og kva dei felles pengane våre skal brukast på.

2. Kva er stortingsval?

Stortingsval er val til Stortinget. Då vel vi dei 169 stortingsrepresentantane, som skal sitje saman på Stortinget.

3. Kvifor har vi stortingsval?

Vi har stortingsval fordi det er folket som skal bestemme kven som sit på Stortinget. Det er noko av det viktigaste i eit demokrati.

4. Når er stortingsvalet?

Valdagen er måndag 8. september 2025.

5. Kor ofte er det stortingsval?

Det er stortingsval kvart fjerde år. Etter valet i 2025, er neste val i 2029.

6. Kven kan stemme?

Alle som har stemmerett, kan stemme i valet. Vi får stemmerett det året vi fyller 18 år. I stortingsvalet er det berre norske statsborgarar som kan stemme. 

7. Kven kan vi stemme på?

I stortingsvalet stemmer vi på politiske parti. Før valet lagar alle partia listar som vi kan stemme på. På listene står det namn på personar som partia vil at skal sitje på Stortinget.

8. Kvar kan vi stemme?

Stortingsvalet går føre seg i heile landet. For å stemme, går vi til eit vallokale. Vi kan anten stemme på førehand (førehandsstemme) eller stemme på valdagen. Dei som vil førehandsstemme, kan gjere det kvar som helst i landet. Dei som vil stemme på valdagen, må gå til vallokalet der dei bur.

I Noreg har vi hemmeleg val. Det betyr at ingen kan krevje å få vite kva parti andre har stemt på.

9. Kven kjem til på vinne valet?

Ingen veit sikkert kven som kjem til å vinne valet. Først når valet er ferdig og alle stemmene talt opp, veit vi kven som har fått flest stemmer. 

10. Kva skjer etter valet?

Når vallokala stengjer, skal stemmene teljast opp for å finne ut kor mange stemmer dei ulike partia har fått. Jo fleire stemmer, jo fleire stortingsrepresentantar!

Når det nye Stortinget er på plass, er det oppgåva til stortingsrepresentanten å bestemme kva parti som skal lage ei regjering.

11. Kven blir statsminister?

Ofte blir leiaren i det partiet som har fått flest stemmer statsminister. Men det treng ikkje alltid å vere sånn. Det er fordi partia samarbeider med kvarandre.

Viss fleire parti som samarbeider, blir større enn partiet som har fått flest stemmer, kan ein annan partileiar bli statsminister.