Stortinget kontrollerer regjeringa
Stortingsrepresentantane stiller ofte spørsmål til regjeringa om kva dei gjer med ulike saker. Dei kan sende spørsmåla skriftleg eller be regjeringa komme til Stortinget for å svare.
Kva gjer regjeringa?
Når Stortinget har bestemt noko, er det regjeringa sin jobb å gjennomføre det.
La oss finne på eit døme: Stortinget bestemmer at alle barn skal ha ein ekstra skuletime med kroppsøving i veka.
Då er det regjeringa som skal sørgje for at det skjer. Det må leggjast til rette for dette på skulane. Kanskje trengst det fleire gymsalar og fleire kroppsøvingslærarar?
Stortinget følgjer med
Etterpå følgjer stortingsrepresentantane med på kva regjeringa gjer og kontrollerer at det blir slik Stortinget har bestemt.
Kvar onsdag er det spørjetime i stortingssalen. Då kan stortingsrepresentantane stille spørsmål til regjeringa.
Ofte lurer dei på kva regjeringa har tenkt til å gjere med ulike saker. Det kan komme spørsmål om gamle skulebygningar, straumprisar, krig i andre land og mykje anna.
Stortinget kan også kalle inn regjeringa til ei høyring. Då undersøkjer dei ei sak nærare for å finne ut kva som har skjedd.
I høyringa stiller stortingsrepresentantane spørsmål, og regjeringa må svare. Slik får Stortinget den informasjonen dei treng.
