Stortinget vedtek lovene

Stortingsrepresentantene er delt inn i komitear. Ein komité er ei gruppe som arbeider med bestemde ting. I komiteane samarbeider representantar frå alle partia på Stortinget.

To døme:

• Utdannings- og forskingskomiteen jobbar med skule og barnehage
• Transport- og kommunikasjonskomiteen jobbar med vegar og kollektivtransport

Når komiteen får eit lovforslag, er det deira oppgåve å finne ut mest mogleg om forslaget.

Komiteen kan invitere til høyring på Stortinget. Då kan organisasjonar komme og fortelje kva dei meiner om forslaget. Viss forslaget handlar om skule, kan komiteen til dømes høyre kva elevar og lærarar meiner.

Alle har rett til å seie si meining om lovforslaget.

Nokon sender eit innspel til Stortinget. Andre skriv lesarinnlegg, deltek i demonstrasjonar eller samlar inn underskrifter.

Når komiteen er ferdig med å undersøkje lovforslaget, snakkar stortingsrepresentantane med partia sine.

Kvart parti bestemmer seg for om det er for eller mot forslaget.

Debatten går føre seg i stortingssalen.

Her fortel stortingsrepresentantane om dei og deira parti er for eller mot lovforslaget, og kvifor.

Når stortingsrepresentantane stemmer i stortingssalen, bruker dei knappar. Dei trykkjer på grøn knapp for å stemme for og raud knapp for å stemme mot.

Viss fleirtalet stemmer mot, blir lovforslaget forkasta. Det betyr at det ikkje blir ei ny lov.

Viss fleirtalet stemmer for, blir lovforslaget vedteke.

Etter lova er vedteken tek regjeringa den med til statsråd på slottet. Der signerer både kongen og statsministeren lova.

No har lovforslaget vorte til ei lov, som gjeld for alle.