Reisetilskot

Skuleklassar på ungdomstrinnet og i vidaregåande skule som har bestilt og fått stadfesta plass i eit av Stortingets stadlege læringsspel, kan søkje om økonomisk tilskot til reisekostnadene. 

Formålet med tilskotsordninga er å stimulere skuleklassar med lang reiseveg til å delta i læringsspela.

Tilskotsordninga blir forvalta av Stortingsadministrasjonen.

Tilskot blir gitt etter følgjande geografiske fordeling i to soner:

• Sone 1: Inntil 1100 kroner per deltakar (Innlandet, Buskerud, Østfold, Vestfold og Telemark).
• Sone 2: Inntil 2200 kroner per deltakar (Finnmark, Troms, Nordland, Svalbard, Trøndelag, Møre og Romsdal, Vestland, Rogaland og Agder).

Frå 1. januar 2025 blir tilskotet auka for sone 1 til 1 400 kroner per deltakar, og tilskotet for sone 2 til 2800 kroner per deltakar. Tilskotsbeløpa blir deretter justerte årleg med same prosentsats som løyvinga til ordninga.

Det blir gitt tilsvarande tilskot for inntil to lærarar/følgjespersonar i tillegg til elevane. Det skal alltid vere med minst éin lærar eller følgjer.

Tilskotsordninga gjeld ikkje for skular i Oslo og Akershus.

Reisetilskotet skal nyttast til reisa til og frå Oslo, og eventuelt éi overnatting viss tur-retur Oslo vanskeleg lèt seg gjennomføre på éin dag.

Tilskotet kan nyttast til fly, ferje, tog, buss, flytog og flybuss. Det kan ikkje nyttast til køyregodtgjersle, parkering eller drosje. Det kan heller ikkje nyttast til kollektivtransport i Oslo.

Tilskotet kan ikkje nyttast til matutgifter.

Prioritering av søknader

Dersom innkomne søknader i ein søknadsrunde til saman utgjer ein sum større enn det som er sett av, skal jamn geografisk fordeling vere avgjerande for fordelinga.

Søknadsfristar

Stortingsadministrasjonen angir søknadsfristar for kvar søknadsrunde. Søknader som blir mottekne etter utløpet av ein søknadsfrist skal avvisast.

Tilskotet blir utbetalt etter gjennomført besøk. Skulen skal fylle ut refusjonsskjema som anvist av Stortingsadministrasjonen. Det skal følgje med dokumentasjon på alle utlegg som tilskotet skal dekkje.

Elevane det blir søkte om refusjon for, må ha gjennomført læringsspelet på Stortinget.

Refusjonskravet blir sendt inn frå skulen seinast 30 dagar etter besøket, saman med utfylt spørsmålsskjema om besøket. Oversendinga skal vere signert rektor på skulen. Viss fristen på 30 dagar ikkje blir overhalden, kan Stortinget avvise kravet.

Tilskotet blir utbetalt normalt innan 30 dagar etter motteke krav.

Dersom skuleklassen eller nokre elevar må avbestille besøket og reisa, kan det ikkje krevjast refusjon for den eller dei som ikkje kan delta.

Dersom Stortinget kansellerer besøket, kan skulen framleis søkje om refusjon for kostnader som ikkje kan unngåast. Det føreset at skulen kan dokumentere at billettar og/eller overnatting ikkje kan avbestillast, og at tapet ikkje blir reiseforsikring dekt av.

Skulen kan innan 3 veker klage på avslag på søknad om tilskot. Klageinstans er Stortingets direktør. Prinsippa i kapittel VI i forvaltningslova gjeld tilsvarande.

Tilsvarande kan skulen innan 3 veker klage på utbetaling av tilskot.