Lag eit demokratisk bygg!

Om oppgåva

I denne prosjektoppgåva lærer elevane om demokrati og medborgarskap med utgangspunkt i arkitektur og offentlege rom. Dei reflekterer rundt korleis demokratiske prinsipp kan bidra til god arkitektur, og korleis arkitektur og bymiljø kan støtte opp om demokratiet. 

Opplegget kan passe for undervisning i kunst og handverk på ungdomsskulen, eller kunst, design og arkitektur på VGs. Det er godt eigna til eit tverrfagleg samarbeid med både norsk og samfunnsfag.

Vanskegrad og tilpassing

Denne oppgåva kan tilpassast ulike alderstrinn og vanskegrader. Teksten på landingssida er skriven for elevar på ungdomsskule og VGs, og fungerer som ein introduksjon til oppgåva.

Elevane bør kjenne godt til demokrati som styringsform og forstå dei ulike demokratiske prinsippa som blir nemnde. 

Opplegget kan også fungere godt for lågare trinn, men bør då tilpassast. Du kan hoppe over teksten på landingssida for desse elevane. Jobb heller først med å få på plass kunnskap om demokrati som styringsform og nokre demokratiske prinsipp. 

I staden for at elevane skal lage kva bygning som helst, kan du til dømes be dei laga ein ny stortingsbygning eller eit rådhus. Du kan leggje endå fleire føringar ved å bestemme kva for nokre demokratiske prinsipp bygningen skal støtte opp under.

Du kan auke vanskegrada ved å be elevane velje kva materiale dei ville brukt dersom bygningen faktisk skulle byggjast, og/eller be dei teikne bygningen med mål først.

Du kan også leggje til estetiske kriterium og føringar for korleis bygningen skal passe med omgivnadene. Kanskje kan du også å be elevane reflektere rundt prosessen med å forme ut bygningen – kven burde få komme med innspel?

Gjennomføring:

Introduksjon (Par/felles. ca. 45 min):

1. Snakk saman om kva som kjenneteiknar eit demokrati. Lag gjerne eit tankekart. La elevane snakke saman i par før dei deler i felleskap.
2. Ta samtalen vidare til arkitektur – kva bygningar knyter dei til demokratiet? Kvifor?
3. Vis bileta i biletkarusellen i teksten, og reflekter i par/fellesskap rundt kva som fungerer bra eller dårleg med dei ut frå tankekartet. Her kan du gjerne finne fleire/andre bygningar i lokalsamfunnet. Kva er det med desse bygningane som gjer at dei har med demokratiet å gjere? Notar nokre stikkord.

La elevane lese teksten på landingssida individuelt, og del ev. ut skjemaa dei skal fylle ut, dersom dei skal ha dei skrive ut.

Hovudarbeid (Individuelt. ca. 8 skuletimar)

Elevane byrjar arbeidet med å lage sin eigen modellbygning. 

Du bestemmer kva materiale elevane kan bruke. Kanskje er dette eit godt høve til å bruke rest- eller avfallsmateriale, for å få elevane til å også reflektere rundt berekraft? 

Tenk også på om det er nokre konkrete teknikkar eller arbeidsmetodar elevane skal bruke i arbeidet, eller om dei står fritt til å velje alt sjølv. 

Oppgåva er tenkt som eit prosjektarbeid som elevane kan jobbe med over tid. Du vurderer kor omfattande du vil at sluttproduktet skal vere, men 6-8 skuletimar kan vere eit utgangspunkt for å lage sjølve modellen.

Vurdering og konsolidering:

Be gjerne elevane om å skrive ein sluttrapport. Elevane tek då utgangspunkt i skjemaet dei har fylt ut undervegs i arbeidet, for å reflektere rundt korleis bygningen er tenkt å støtte opp om demokratiske prinsipp. Dei kan også drøfte estetiske val, materialval og arbeidsmetode. 

Sluttrapporten kan du bruke som ein del av vurderinga. Denne kan eventuelt også vurderast i samfunnsfag og/eller norsk.